1- يعني ايه وديعه الصيانه؟

هي مبلغ مالي تم تحديده من الشركة المالكة عند شراء الوحده ( فيلا / شقة / محل ) , ويتم دفعها للشركة لمره واحده قبل استلام الوحده وذلك لاستغلال العوائد والأرباح والفوائد البنكية الخاصه بها في مصاريف الصيانه .

2- ازاي بتتحسب العوائد والأرباح والفوائد البنكية الخاصه بالوديعه؟

هي نسب مئويه خاصه بالأرباح للبنوك والسندات وشهادات الاستثمار وخلافه , فمثلا لو حضرتك دافع للشركة وديعه صيانه قدرها ( 20 ألف جنيه ) , وكانت النسبة المئوية في حينه 10% , بالتالي تكون العوائد والأرباح والفوائد البنكية السنوية لهذا العام ( 20000 * 10% ) = 2000 جنيه .

3- يعني ايه مصاريف الصيانه؟

هي المصاريف السنوية التى يتم صرفها مقابل خدمات المدينة ( أمن – زراعه – نظافه – رى – تجديدات ….. الخ ) , ويتم تحصيلها من خلال العوائد والأرباح والفوائد البنكية الخاصه بوديعه الصيانه .

4- ازاي بتتحسب مصاريف الصيانه للوحده؟

يتم حساب اجمالي مصروفات الصيانه السنوية لكامل المدينة مثلا ( مليون جنيه ) , وقسمها على اجمالي عدد الأمتار الموجوده بكامل المدينة مثلا ( 40 ألف متر ) حسب السكني والتجاري , ليكون نصيب كل متر ( قيمة المصروفات 1000000 / عدد الأمتار بالمدينة 40000 ) = 25 جنيه للمتر , مع العلم أن سعر المتر بيتخلف من سنه للتانيه حسب المصاريف والأسعار وبيختلف السعر من السكني للتجاري .

يعني لو مثلا مساحه وحدتك 100 م2 , بالتالي يكون قيمة مصروفات الصيانه الخاصه بالوحده هي ( مساحه الشقه 100 م2 * سعر متر الصيانه 25 جم ) = 2500 جنيه .

5- يعني ايه فروق الصيانه؟

فهي فرق المبلغ ما بين قيمة الأرباح ( الموجوده بالفقرة رقم 2 ) وقيمة المصروفات السنوية ( الموجوده بالفقرة رقم 4 ) سواء بالعجز أو الزياده .

فمثلا في المثال المشروح ظهر وجود عجز ( فرق ) = 2500 جنيه – 2000 جنيه = 500 جنيه .

واذا كانت قيمة الوديعه أعلى فبالتالي ستكون أرباح أعلى ومن الممكن أن يكون لك مبالغ اضافيه ( فائض ) وليس فروق .

6- طيب لو طلع ليا فلوس اضافيه ( فائض ) مش عجز أزاي أخدها؟

لو طلع ليك فلوس مع الأسف الشركة هنا مش بترجعالك نقديا وده برضه غير قانوني , ولكن ممكن تستغل الفلوس دي بأنك تتوجه للجهاز وتقدم طلبين , الطلب الأول أن المصروفات الخاصه باناه العماره واستهلاك مياه العماره يتم خصمها من رصيدك , الطلب الثاني أن يتم اضافه الفلوس الزياده ( الفائض ) الى أصل مبلغ الوديعه .

يعني لو مثلا كانت وديعتك 30 ألف جنيه , وعندك فائض 1000 جنيه هيكون وديعتك قيمتها 31 ألف جنيه , وكده كده دي في الأخر فلوسك يعني موجوده وهتطلعك فلوس سنوية أكتر بعد كده .

7- هل لو طلع عندي عجز في مبلغ الصيانه , هل أدفع ولا أمتنع عن الدفع؟

لحين الفصل القضائي في الموضوع بأحقية دفع فروق الصيانه من عدمه , حضرتك بتأخد مرتبك مقابل منتج أو عمل بتقوم بيه يعني مش لاقي فلوسك في الأرض , يعني حضرتك لو روحت مطعم والأكل عجبك واداك فاتورة محترمه هتروق الناس اللي موجوده في المطعم وهتتدفع وانت ساكت ومبسوط كمان .

ده برضه نفس الموضوع, يعني من الأخر لو لقيت نفسك بتأخد خدمه مقابل اللي بتدفعه وفيه شفافيه في المصروفات والميزانيات وشايف أن فلوسك بتتصرف صح وأن فعلا أنت واخد حقك طبعا لازم تتدفع وتدليهم حقهم وفوقيه بوسه , بس لو العكس طبعا متدفعش مليم لحد ما تلاقي حقك واخده تالت ومتلت .

من الأخر بعد الشرح ده كله الحسبه ببساطه

لو سعر متر الصيانه في العام الحالي مثلا 36 جنيه تضربها في مساحه شقتك مثلا ال 100 متر ( 36 * 100 ) = 3600 جنيه ده تكلفه مصاريفك .

وشوف انت دافع وديعه أد ايه مثلا 20 ألف جنيه  اضربها في نسبة الأرباح مثلا 12% ( 20000*12% ) = 2400 جنيه

يبقي أنت عليك فروق صيانه قدرها ( 3600 – 2400 ) = 1200 جنيه .